Dinten Kemis, 12 September 2024 SMKN 2 Mojokerto ngawontenaken program enggal. Program menika kalebet salah satunggaling program ingkang dipunwiwiti saking kurikulum SMKN 2 Mojokerto. Program menika program Kawi Laras (Kamis Wiwitan Laku Adab Lan Rasa Sayekti)
Program kawi laras menika dipuntindakaken ing minggu kaping kalih saben wulan. Program menika mbutuhaken sedoyo siswa, guru lan karyawan ngagem busana lurik lan kebaya kangge wanita lan lurik kangge tiyang jaler.
Miturut Ibu Melati Puspitasari, S.Pd, Waka Kurikukulum SMK Negeri 2 Mojokerto “Ing jaman sapunika, pangrembakipun teknologi lan budaya asing saged ngrasuk saha ngowahi cara pikir lan lampahipun generasi muda. Amargi punika, kita kedah nguri-uri budaya adiluhung ingkang sampun katilaraken saking leluhur, kados basa lan sandhangan tradisional Jawa. Mboten namung dados warisan budaya, basa lan sandhangan Jawa punika nyimpen filosofi ageng kangge nggilut sipat-sipat luhur lan tatakrama ing masyarakat. Kanthi wontenipun kegiatan sedinten ngangge basa lan sandhangan Jawa, kula gadhah pengajeng-ajeng bilih para siswa saged langkung mirengaken, ngraosaken, lan ngugemi nilai-nilai kabudayan Jawa. Basa Jawa gadhah tingkatan basa ingkang tegesipun dede sinamun ing tata krama saha rasa hormat dhumateng tiyang sanes. Kanthi kagiyatan menika, para siswa saged sinau bab rasa unggah-ungguh, ngajeni tiyang ingkang langkung sepuh, lan tetep tepa selira dhumateng sesami. Saged dipunpertelaaken bilih kabudayan lan filosofi Jawa kados pituduhing "Ajining diri soko lathi, ajining rogo soko busono" punika gadhah peran ingkang ageng kangge mbentuk karakter jujur, santun, lan tanggung jawab. Kula gadhah pengajeng-ajeng bilih para siswa boten namung saged nguwasani ilmu pengetahuan modern, ananging ugi saged ngugemi nilai-nilai luhur budaya Jawa, saengga saged dados generasi ingkang berkarakter luhur, ngajeni sesami, lan mituhu dhumateng tuntunaning masyarakat Jawa”.
Program menika angsal dukungan saking Drs. Akhmad Mukhlason, M.MPd selaku kepala SMK Negeri 2 Mojokerto, Tim Manajemen, serta Bapak Ibu Guru, staf TU lan sedaya keluarga SMK Negeri 2 Mojokerto.
Mugi-mugi para siswa SMKN 2 Mojokerto nggadhahi sikap ingkang sae saha bekti dhateng para guru saha sesepuh.
Tim Jurnalistik SMK Negeri 2 Mojokerto
